Rannsóknir og þjónusta

Rannsóknir
Rannsóknar- og þróunarverkefni stofnunarinnar eru fyrst og fremst unnin með kennurum Stjórnmálafræðideildar á viðkomandi sviði.
Gunnar Helgi Kristinsson prófessor og Ómar H. Kristmundsson prófessor hafa stýrt tveimur verkefnum, sem bæði eru afar umfangsmikil og taka til grundvallarþátta hins opinbera, þ.e. stjórnunar- og starfsumhverfis ríkisstofnana annars vegar og lýðræðisforma og félagsauðs í sveitarfélögum hins vegar. Á árunum 2014-2017 heldur Stofnun stjórnsýslufræða og stjórnmála utan um Vald- og lýðræðisrannsókn Félagsvísindasviðs þar sem þátt taka um 30 fræðimenn úr ólíkum deildum sviðsins, en rannsóknarstjóri þessa verkefnis er dr. Gunnar Helgi Kristinsson, prófessor.
 
Alþjóðlegt samstarf
Frá upphafi hefur Stofnun stjórnsýslufræða og stjórnmála lagt áherslu á samstarf við erlenda aðila, m.a. með þátttöku í samstarfsnetum háskóla einkum í Evrópu og á Norðurlöndum, með því að stuðla að stúdentaskiptum og með því að fá til kennslu og fyrirlestrahalds á Íslandi ýmsa leiðandi erlenda aðila á sviði stjórnsýslufræða, auk þess sem stofnunin hefur verið framkvæmdaaðili nokkurra alþjóðlegra ráðstefna sem haldnar hafa verið hér á landi.
 
Námskeið, fyrirlestrar o.fl.
Eitt af meginverkefnum Stofnunar stjórnsýslufræða og stjórnmála er að skapa vettvang umræðu og fræðslu um viðfangsefni stjórnsýslu og stjórnmála fyrir fag- og áhugafólk um þessi efni á Íslandi. Fjöldi fyrirlestra, málþinga og námskeiða eru haldin á ári hverju í samstarfi við aðila utan sem innan Háskóla Íslands. Flestir viðburðir eru opnir, en einnig hefur stofnunin samkvæmt samkomulagi skipulagt framkvæmd lokaðra námskeiða og viðburða fyrir starfsfólk og stjórnendur tiltekinna stofnana eða félaga. 
 
Stjórnsýsluúttektir
Stofnunin hefur tekið að sér gerð stjórnsýsluúttekta fyrir ríki og sveitarfélög, m.a. á sérstökum verkefnum á vegum Reykjavíkurborgar og mennta- og menningarmálaráðuneytis. 
 
Þú ert að nota: brimir.rhi.hi.is