Morgunverðarfundur: Hvernig bætum við stefnumótun og framkvæmd opinberrar þjónustu á grunni atferlisfræða og gagnreyndrar þekkingar?

Stofnun stjórnsýslufræða og stjórnmála og Félag forstöðumanna ríkisstofnana í samstarfi við forsætisráðuneyti kynna:

Hvernig bætum við stefnumótun og framkvæmd opinberrar þjónustu á grunni atferlisfræða og gagnreyndrar þekkingar? 

Morgunverðarfundur, miðvikudaginn 8. febrúar, kl. 8:30-10:00 á Grand hótel Reykjavík
Morgunverður, frá kl. 8:00,  er innifalinn í þátttökugjaldinu sem er kr. 5.800-
 

SKRÁNING á viðburðinn

 
Framsöguerindi:
Dr. Tiina Likki, sérfræðingur hjá BIT: Behavioural Insights Team í Bretlandi
Dr. Hulda Þórisdóttir, dósent við Stjórnmálafræðideild Háskóla Íslands
 

Stjórnvöld í allnokkrum löndum,  þ.á.m. Bretlandi, Finnlandi, Frakklandi, Bandaríkjunum og Ástralíu, hafa á undanförnum 5-7 árum innleitt hagnýtingu á atferlisvísindum sem þátt í opinberri stefnumótun og stefnuframkvæmd. Á Stjórnarráðsdeginum síðdegis þann 8. febrúar n.k. verður gestur dr. Tiina Likki, sérfræðingur hjá  bresku einingunni sem sér um innleiðingu þessarar aðferðafræði þar í landi, BIT: Behavioural Insights Team. Mun Tiina segja frá reynslu og aðferðaferðafræði bresku stjórnsýslunnar að þessu leyti, bæði kenningalegum grunni og aðferðum, en ekki síður mun hún taka dæmi þar sem aðferðafræðinni hefur verið beitt.

Tiina Likki mun flytja erindi um sama efni á morgunverðarfundinum, en þar mun auk hennar Hulda Þórisdóttir stjórnmálasálfræðingur og dósent við HÍ fjalla um þær kenningar og rannsóknir sem liggja til grundvallar, og leitast við að tengja þær íslenskum viðfangsefnum. Einnig hefur verið leitað til Huldu um að halda námskeið fljótlega í kjölfarið þar sem farið yrði dýpra í efnið.
 
Markmið Behavioural Insights Team er þríþætt: Að gera opinbera þjónustu skilvirkari, hagkvæmari og aðgengilegri fyrir fólk; að auka árangur og útkomu með því að innleiða þekkingu um hegðun einstaklinga í stefnumótun og; að auðvelda fólki að „taka ákvarðanir sem gagnast því sjálfu“.  BIT er ætlað að styrkja stefnumörkun stjórnvalda með því að byggja á þekkingu um hegðun fólks, en ekki ágiskunum um hana, sem of oft leiðir til lagasetningar, sem ekki er grundvölluð á þekkingu. Leiðirnar sem BIT leggur til eru m.a. að skipulagsbreytingar séu gerðar í samráði við fólkið sem breytingar snúast um og að rannsóknir séu gerðar áður en breytingar eru innleiddar. Gefnar hafa verið út praktískar leiðbeiningar undir heitinu EAST um það hvað eigi að leggja áherslu á þegar breyta á hegðun. Þar er um fjögur atriði að ræða. Gerum þjónustuna/aðgerðina: 
  • Eftirtektarverða, t.d. með því að draga athygli að henni með litum og myndum eða með því að persónugera hana; 
  • Auðvelda, t.d. með því að einfalda skilaboð, bréf og umsóknareyðublöð, hafa sjálfgefinn (default) valkost, fylla út svo mikið sem hægt er fyrirfram; 
  • Samfélagslega, t.d. með því að vísa til þess að flestir geri þetta svona; 
  • Tímanlega, t.d. með því að ýta tímanlega við fólki með símaskilaboði. 

Leiðbeiningar frá Behavioural Insights Team í Bretlandi: EAST: Four simple ways to apply behavioural insights (pdf).

Skýrsla um framkvæmd í Bandaríkjunum: Behavioral Economics and Social Policy: Designing Innovative Solutions for Programs Supported by the Administration for Children and Families (pdf).

Þú ert að nota: brimir.rhi.hi.is