Undanþáguákvæði upplýsingalaga – Hvenær er skylt og hvenær er heimilt að gæta leyndar samkvæmt upplýsingalögum?

 

- Nýtt námskeið -

Nýtt námskeið hjá okkur sem haldið verður þriðjudaginn 17. október 2017, kl. 9:00-12:30, í húsnæði Menntavísindasviðs HÍ við Stakkahlíð, stofa K-208 - Klettur

Verð: kr. 17.500-

Námskeiðið er fullbókað og því hefur verið lokað fyrir skráningu.
Hér er hægt að skrá sig á biðlista vegna námskeiðsins.

 

Umsjónarmaður og fyrirlesari: Kjartan Bjarni Björgvinsson, héraðsdómari og dósent við lagadeild Háskólans í Reykjavík.

Í námskeiðinu verður farið yfir helstu undanþágur frá meginreglu upplýsingalaga um rétt almennings til aðgangs að gögnum með tilliti til þess hvernig þær hafa verið skýrðar í dómaframkvæmd Hæstaréttar og úrskurðum úrskurðarnefndar um upplýsingamál.

Fjallað verður um að hvaða marki stjórnvöldum kann að vera óheimilt að afhenda upplýsingar um einstaklinga á þeim forsendum að þær varði einkamálefni sem sanngjarnt er og eðlilegt að leynt fari. Enn fremur verður sjónum beint að því hvenær viðskiptalegir og fjárhagslegir hagsmunir fyrirtækja geta komið í veg fyrir að stjórnvöld veiti aðgang að upplýsingum. Þá verður lýst helstu tilvikum þar sem stjórnvöldum er óheimilt að veita aðgang vegna almannahagsmuna.

Í námskeiðinu verður einnig fjallað um þau tilvik þar sem stjórnvöld mega bera fyrir sig leynd án þess þó að þeim sé óheimilt að veita aðgang, eins og t.d. um vinnugögn, gögn sem lögð eru fyrir ráðherra og gögn sem varða starfsmannamál.

Markmiðið með námskeiðinu er að þátttakendur öðlist undirstöðuþekkingu á undanþáguákvæðum upplýsingalaga nr. 140/2012. Umfjöllunin verður studd dæmum um framkvæmd laganna og þá m.a. vísað til úrskurða úrskurðarnefndar um upplýsingamál, dóma Hæstaréttar og álita umboðsmanns Alþingis.

Markhópur:  Starfsmenn stjórnsýslunnar sem leysa þurfa úr álitaefnum um hvort veita eigi aðgang að upplýsingum. Fjölmiðlamenn, fræðimenn og allir aðrir sem áhuga hafa á að nýta sér lögin til að kynna sér gögn og upplýsingar í vörslum stjórnvalda.   

 

Ekki verður boðið upp á fjarnám þessu sinni.

Kennari: Kjartan Bjarni Björgvinsson er cand.jur. frá Háskóla Íslands og með meistarapróf frá London School of Economics 2006. Hann hefur verið skipaður dómari við Héraðsdóm Reykjavíkur frá 2015 og dósent við lagadeild Háskólans í Reykjavík frá 2016. Hann hefur einnig starfað sem formaður rannsóknarnefndar Alþingis og aðstoðarmaður umboðsmanns Alþingis, auk þess að vera skipaður varaformaður úrskurðarnefndar um upplýsingamál frá 2017.

Þú ert að nota: brimir.rhi.hi.is