Sameyki styrkir lokaritgerð í meistaranámi í opinberri stjórnsýslu

Bryndís Theódórsdóttir MPA nemi í opinberri stjórnsýslu við Stjórnmálafræðideild HÍ hlaut í gær þann 15. maí 750.000.- króna styrk frá Sameyki stéttarfélagi til þess að rannsaka tengsl vinnuumhverfis og veikindafjarvista kvenna hjá ríkinu. Til þess mun hún nýta niðurstöður úr könnununum um Stofnun ársins síðastliðin ár og að bera saman þær niðurstöður við veikindafjarvistir starfsmanna sömu stofnana og skoða hvort fylgni sé á milli einhverra þátta sem könnunin mælir og fjölda veikindadaga. Leiðbeinandi Bryndísar er Eva Marín Hlynsdóttir dósent.
 
Styrkurinn er veittur í samstarfi við Stofnun stjórnsýslufræða og stjórnmála og skrifuðu Árni Stefán Jónsson formaður Sameykis og Margrét S. Björnsdóttir stjórnarformaður stofnunarinnar undir samning þess efnis. Styrkurinn var auglýstur meðal nemanda í opinberri stjórnsýslu og var ákveðið að styrkja rannsókn Bryndísar. Enda er hún mjög áhugaverð sérstaklega með tilliti til þess að veikindafjarvistir kvenna hjá ríkinu virðast hærri en karla og með rannsókninni er mögulegt að varpa ljósi á hvort og þá hvaða þættir það eru í starfsumhverfi kvenna sem veldur gætu valdið því.
 
Það var formaður Sameykis Árni Stefán Jónsson sem tilkynnti um styrkveitinguna á Stofnun ársins og afhenti Bryndísi blóm af því tilefni.
 
 
17. maí 2019 - 10:00
Þú ert að nota: brimir.rhi.hi.is