Hádegisfundur 12. des: Um stjórnmálamanninn Halldór Ásgrímsson

Í tilefni af útkomu ævisögu Halldórs Ásgrímssonar sem Guðjón Friðriksson sagnfræðingur hefur ritað, býður Stofnun stjórnsýslufræða og stjórnmála við Háskóla Íslands til hádegisfundar nk. fimmtudag þann 12. desember, frá kl. 12 - 13, í Lögbergi stofu 101.
 
Þar mun höfundurinn Guðjón Friðriksson stikla á stóru um áhrif Halldórs á íslensk stjórnmála og Jón Sigurðsson fyrrv. formaður Framsóknarflokksins bregðast við og lýsa sinni reynslu og sýn á stjórnmálamanninn Halldór Ásgrímsson. Eftir erindin gefst tími til fyrirspurna og umræðna. 
 
 
 
Úr kynningu Forlagsins á bókinni: 
“Halldór Ásgrímsson var áratugum saman einn áhrifamesti stjórnmálamaður landsins og naut trausts langt út fyrir sinn flokk, Framsóknarflokkinn; kaupfélagsstjórasonurinn sem aldrei tók stúdentspróf en var þó orðinn lektor við viðskiptadeild Háskóla Íslands aðeins 25 ára að aldri. Veran þar var ekki löng, hann var kjörinn á þing og helgaði stjórnmálunum líf sitt næstu áratugi, var formaður flokks síns í tólf ár. Hann varð sjávarútvegsráðherra hálffertugur og sigldi þar í gegnum mikla erfiðleikatíma með umdeildum ráðstöfunum. Síðar var hann utanríkisráðherra lengur en nokkur annar, fór víða og hafði kynni af fjölda erlendra áhrifamanna. Forsætisráðherra var hann frá 2004 og þar til hann hvarf af vettvangi stjórnmálanna 2006. Guðjón Friðriksson rekur hér sögu Halldórs og segir frá uppvexti hans á Vopnafirði og Höfn í Hornafirði, sjómennsku og öðrum störfum, stjórnmálaferli, baráttu- og áhugamálum, sigrum og ósigrum. Sagt er ítarlega frá deilum um kvótakerfi, úthafsveiðar, hvalveiðar, Kárahnjúkavirkjun, Íraksstríðið og fjölda annarra mála. Guðjón hafði aðgang að miklu magni frumheimilda við vinnslu bókarinnar og átti viðtöl við fjölda manna, bæði fjölskyldu Halldórs, vini og samstarfsmenn en einnig pólitíska andstæðinga hans og aðra sem höfðu kynni af honum." 
 
Fundarstjóri Margrét S. Björnsdóttir stjórnarformaður Stofnunar stjórnsýslufræða og stjórnmála við HÍ.
 
Allir velkomnir. 
 
10. desember 2019 - 14:15
Þú ert að nota: brimir.rhi.hi.is