Elítur og valdakerfi á Íslandi - ný bók

Út er komin bókin Elítur og valdakerfi á Íslandi, eftir dr. Gunnar Helga Kristinsson prófessor í stjórnmálafræði við Háskóla Íslands. Bókin er gefin út í framhaldi af valds- og lýðræðisrannsókn sem unnið var að á vegum hans, Stofnunar stjórnsýslufræða og stjórnmála á árunum 2014 - 2018.
 
Elítum er oft stillt upp sem óvinum alþýðunnar í pólitískri orðræðu samtímans. Þeim er lýst sem þröngum hópum fólks sem ráði raðum sínum í pólitískum skúmaskotum á kostnað hins hreinlynda og óspillta almennings. Popúlistar, bæði á hægri og vinstri væng stjónmálanna, líta svo á að átakaflöturinn milli elíta og almennings sé sá sem mestu skiptir í nútímastjórnmálum.
 
En hvað er í raun vitað um elíturnar? Mynda þær samhentan kjarna sem stýrir samfélaginu á bakvið tjöldin eða samanstanda þær bara af fólki sem hefur náð góðum árangri á sínu sviði? Í þessari bók er þróun valdakerfanna á Íslandi rakin frá því á nítjándu öld og gögn birt um samsetningu og starfshætti elítuhópa á mismunandi sviðum samfélagsins. Aðferðafræðin tekur mið af norrænum elíturannsóknum en er löguð að íslenskum aðstæðum.
 
Niðurstöður höfundar benda til þess að íslenska valdakerfið hafi þróast frá ættarveldi á nítjándu öld til flokksræðis á þeirri tuttugustu en hins vegar megi á þeirri tuttugustu og fyrstu greina valdakerfi í mótun sem hafi aukin einkenni margræðis.
 
Bókin er gefin út af Háskólaútgáfunni og fræðilegur ritstjóri er Margrét Sigrún Sigurðardóttir dósent við Viðskiptafræðideild Háskóla Íslands. Hana má nálgast í helstu bókaverslunum og hér á vef Háskólaútgáfunnar.
21. september 2021 - 8:15
Þú ert að nota: brimir.rhi.hi.is