Stýrihópur um rafræna stjórnsýslu hefur störf

Í frétt á vef Innanríkisráðuneytisins kemur fram að stýrihópur um rafræna stjórnsýslu og rafrænt lýðræði sem Ögmundur Jónasson innanríkisráðherra skipaði nýlega kom til fyrsta fundar í vikunni og sat ráðherra fyrsta fundinn. Verkefni hópsins er að vinna úr tillögum nefndar um eflingu sveitarstjórnarstigsins varðandi rafræna stjórnsýslu og lýðræði. Hópnum er ætlað að skila áfangaskýrslu til ráðherra í október.

Í fréttinni kemur fram að helstu áherslurnar í starfi nefndarinnar verði á nauðsyn þess að auðvelda almenningi notkun rafrænnar stjórnsýslu og að rekin verði ein þjónustugátt fyrir alla rafræna þjónustu hins opinbera.Í skýrslu nefndar um eflingu sveitarstjórnarstigsins (sem kom út í byrjun árs 2012) voru settar fram 24 tillögur um aðgerðir til að efla sveitarstjórnarstigið og tóku 9 þeirra til atriða er varða rafræna stjórnsýslu. Nefndin lagði meðal annars til að innanríkisráðuneytið og Samband íslenskra sveitarfélaga hefðu um það forystu og að nýta vefinn Ísland.is hjá Þjóðskrá sem vettvang fyrir slíkar umbætur. Nefndin lagði einnig  til að ráðuneytið hefði forgöngu um gerð einna laga um kosningar í stað aðskilinna laga eftir mismunandi tegundum kosninga og að í þeim lögum verði regluverk um rafrænar kosningar og rafræna kjörskrá. Í skýrslunni var einnig undirstrikað mikilvægi þess að mótað yrði fyrirkomulag varðandi rafrænar undirskriftasafnanir, skoðanakannanir og íbúakosningar og voru sveitarfélög hvött til að vinna með ráðuneytinu að þessum málefnum.

Stýrihópnum er falið að vinna verk- og kostnaðaráætlun yfir verkþætti sem vinna þarf í því skyni að ná þeim markmiðum sem að er stefnt og stuðla að framgangi þeirra.

Frétt Innaríkisráðuneytisins frá 26. júní sl.

Tillögur nefndar um eflingu sveitarstjórnarstigsins, Innanríkisráðuneytið, febrúar 2012

Þú ert að nota: brimir.rhi.hi.is