Fundur um stofnun sjálfst. mannrétt.stofnunar á Íslandi

Innanríkisráðuneytið stendur fyrir opnum morgunverðarfundi um hvort að ráðast eigi í að stofna sjálfstæða mannréttindastofnun á Íslandi fimmtudaginn 4. október næstkomandi kl. 8.30–11 í Iðnó í Reykjavík. Þetta er  sjöundi og næstsíðasti fundur í röð ráðuneytisins um mannréttindamál sem haldnir hafa verið í tengslum við mótun landsáætlunar í mannréttindum. Fundurinn er öllum opinn og aðgangur ókeypis.

Íslensk stjórnvöld hafa fengið athugasemdir og tilmæli á grundvelli flestra þeirra mannréttindasamninga sem Ísland er aðili að um að hér sé ekki starfandi sjálfstæð mannréttindastofnun í samræmi við svokölluð Parísarviðmið. Í reglubundnu allsherjareftirliti með mannréttindaskuldbindingum (UPR) sem fram fór á vettvangi mannréttindaráðs Sameinuðu þjóðanna síðastliðið haust hétu stjórnvöld því að kanna rækilega hvort ráðast skyldi í að koma á laggirnar stofnun í samræmi við athugasemdir alþjóðlegra eftirlitsaðila.

Umfangsmikil vinna fer nú fram á vegum stjórnvalda í tengslum við mótun landsáætlunar í mannréttindum. Með fundaröðinni er leitast við að fá sem flesta til að taka þátt í stefnumótun í málaflokknum til að hún eigi sér ekki aðeins stað innan veggja ráðuneyta heldur í samstarfi og í beinum tengslum við hagsmunaaðila, fræðasamfélag og almenning.



Dagskrá í Iðnó 4. október 2012 kl. 8.30 til 11

Ögmundur Jónasson innanríkisráðherra ávarpar fundinn

Erindi flytja:

Oddný Mjöll Arnardóttir, lektor við lagadeild Háskóla Íslands

Tryggvi Gunnarsson, umboðsmaður Alþingis

Margrét Steinarsdóttir, framkvæmdastjóri Mannréttindaskrifstofu Íslands



Að erindum loknum gefst tími til almennrar umræðu og fyrirspurna.

Hægt verður að kaupa hressingu á fundinum.

Innanríkisráðuneytið hvetur alla áhugasama til þess að mæta á fundinn.

Þú ert að nota: brimir.rhi.hi.is