Bestu opinberu vefirnir 2013

Gerð var úttekt á opinberum vefjum ráðuneyta, stofnana og sveitarfélaga haustið 2013. Þetta var í fimmta sinn sem slík úttekt hefur verið gerð. Niðurstöður könnunarinnar eru mikilvægt tæki til að fylgjast með þróun opinberra vefja með tilliti til innihalds (content), nytsemi (usability), aðgengis (accessibility), þjónustu (service) og lýðræðislegrar þátttöku (e-participation) á vefjum.

Þeir ríkisvefir sem urðu stigahæstir í úttektinni voru: Ríkisskattstjóri (98 stig), Ísland.is (96 stig), Tryggingastofnun ríkisins (95 stig), Veðurstofa Íslands (93 stig), Háskóli Íslands (92 stig), Orkustofnun (92 stig), Sjúkratryggingar Íslands (92 stig) og Tollstjóri (92 stig). Flest stig í flokki sveitarfélagavefja fengu: Reykjavíkurborg (97 stig), Garðabær (91 stig), Hafnarfjarðarkaupstaður (91 stig), Seltjarnarnes (90 stig), Dalvíkurbyggð (89 stig)

Veittar voru viðurkenningar fyrir bestu vefina í tveimur flokkum: annars vegar besta ríkisvefinn og hins vegar besta sveitarfélagsvefinn. Fimm efstu vefirnir í hvorum flokki voru lagðir fyrir dómnefnd sem ákvað hvaða vefir skyldu hljóta viðurkenningu að þessu sinni. Dómnefndin fékk lista yfir efstu vefina í stafrófsröð og án upplýsinga um niðurstöður stiga. Dómnefnd hafði frjálsar hendur við að meta þá þætti sem réðu úrslitum en sérstök áhersla varlögð á viðmót og notendaupplifun.

Niðurstaða dómnefndar var sú að vefur Ríkisskattstjóri, rsk.is, var valinn besti ríkisvefurinn og reykjavik.is, vefur Reykjavíkurborgar var valinn besti sveitarfélagsvefurinn.

Dómnefndina skipuðu; Marta Lárusdóttir, lektor í tölvunarfræði við HR og sérfræðingur í viðmótshönnun, Rakel Pálsdóttir, forstöðumaður almannatengsla hjá Samtökum iðnaðarins og Sigurjón Ólafsson, ráðgjafi hjá Funksjón vefráðgjöf.

Niðurstöður úttektarinnar voru kynntar fimmtudaginn 28. nóvember á UT-deginum 2013 þar sem einnig voru kynnt nokkur verkefni í stefnu upplýsingasamfélagsins.

Þú ert að nota: brimir.rhi.hi.is