Hagsæld og hamingja - Hvernig getur samfélagsgerð haft áhrif á hamingju íbúa?

Á alþjóðlega hamingjudaginn, fimmtudaginn 20. mars n.k. verður haldið opið málþing um hagsæld og hamingju í Hátíðarsal Háskóla Íslands kl. 14-16. Að málþinginu standa Stofnun stjórnsýslufræða og stjórnmála við Háskóla Íslands, Embætti landlæknis, Hamingjuvísir og Þekkingarmiðlun í samstarfi við Reykjavíkurborg, forsætisráðuneytið, Samtök atvinnulífsins og Landsvirkjun.

Dagskrá

Hrefna Guðmundsdóttir býður málþingsgesti velkomna

14:00        Ávarp: Jón Gnarr, borgarstjóri í Reykjavík

14:15        Hvernig getur samfélag haft áhrif á hamingju íbúa? Dr. Ruut Veenhoven, forstöðumaður World Database of happiness

15:00        Hamingja Íslendinga eftir efnahagshrun, Dóra Guðrún Guðmundsdóttir, sviðsstjóri hjá Embætti landlæknis

15:10        Hamingja og stjórnmálaskoðanir, Dr. Hulda Þórisdóttir, lektor í stjórnmálafræði við HÍ

Ragna Árnadóttir, formaður samráðsvettvangs um aukna hagsæld mun bregðast við erindum og ræða hvernig hægt er að nota niðurstöður hamingjurannsókna til stefnumótunar í íslensku samfélagi til framtíðar.

Fundarstjóri er Páll Matthíasson, geðlæknir og forstjóri LSH.

Aðalfyrirlesari er Dr. Ruut Veenhoven sem er virtur vísindamaður í hamingjurannsóknum. Aðrir fyrirlesarar eru Dóra Guðrún Guðmundsdóttir, sviðsstjóri hjá Embætti landlæknis sem ræðir mikilvægi þess að mæla hamingju þjóðarinnar með reglubundum hætti og kynnir nýjustu niðurstöður á rannsóknum um Hamingju Íslendinga og Dr. Hulda Þórisdóttir, lektor í stjórnmálafræði sem ræðir Hamingju og stjórnmálaskoðanir. Ragna Árnadóttir, formaður samráðsvettvangs um aukna hagsæld mun síðan bregðast við erindum og ræða hvernig hægt er að nota niðurstöður hamingjurannsókna til stefnumótunar í íslensku samfélagi til framtíðar.

Borgarstjórinn í Reykjavík, Jón Gnarr opnar málþingið.

Dr Ruut Veenhoven mun halda erindi um hvernig samfélag hefur áhrif á hamingju íbúa en hann hefur verið kallaður ,,guðfaðir hamingjurannsókna”. Hann er heiðursprófessor við Erasmus University í Rotterdam og hefur fengið margar viðurkenningar fyrir rannsóknir sínar. Hann er stofnandi stærsta gagnabanka um mælingar á hamingju í heiminum (The World database of happiness) og fyrrum ritstjóri og stofnandi tímaritsins „The Journal of Happiness Studies“. Rannsóknir hans hafa sýnt að hamingjusamir lifa lengur, eru við betri heilsu, virkari þjóðfélagsþegnar, í betri hjónaböndum og eru síður frá vinnu vegna veikinda. Það er því þjóðfélagslega hagkvæmt að sem flestir séu hamingjusamir auk þess sem það hefur góð efnahagsleg áhrif á bæði atvinnulífið og hið opinbera.

Sameinuðu þjóðirnar hafa útnefnt 20. mars Alþjóðlega hamingjudaginn og eru jafnframt að skoða hvernig megi bæta mælikvarða um hamingju við aðrar mælingar til að meta heildræna framþróun þjóðríkja.





 

Þú ert að nota: brimir.rhi.hi.is