Málstofa um vernd uppljóstrara

Gagnsæi – samtök gegn spillingu stendur ásamt Stofnun stjórnsýslufræða og stjórnmála fyrir opinni málstofu þriðjudaginn 29. september í fyrirlestrarsal Þjóðminjasafns Íslands, kl. 16:30-17:30.

Þar mun Paul Stephenson, fyrrum embættismaður breska dómsmálaráðuneytis, halda fyrirlestur um mikilvægi löggjafar um vernd uppljóstrara.
Hann hefur sérhæft sig í málefnum uppljóstrara eftir að hann lét af störfum hjá breska dómsmálaráðuneytinu árið 2009. Lögin um verndun uppljóstrara voru sett í Bretlandi árið 1999, en þau lög eru, að hans sögn, eitt helsta framlag Bretlands til þessara mála á alþjóðavísu. Stephenson leiddi starf dómsmálaráðuneytisins á sviði varna gegn spillingu, sem formaður sendinefndar Breta hjá GRECO, spillingarvarnardeild Evrópuráðsins, sem Ísland er einnig aðili að.  

Að fyrirlestrinum loknum mun fundarstjóri, Þórunn Elísabet Bogadóttir, aðstoðarritstjóri Kjarnans, stýra fyrirspurnum og umræðum.

Afar erfitt er að greina spillingu innan viðskiptalífsins sem og stjórnsýslu. Spilling er einskonar lokuð hringrás sem erfitt er að uppgötva fyrr en löngu eftir að hún er búin að valda skaða. Oft skortir á viðskiptaþekkingu, fjármála- og spillingarlæsi hjá eftirlitsaðilum til að greina viðvörunarmerkin.
 
Uppljóstrarar innan fyrirtækja og stofnana gegna mikilvægu hlutverki við að koma upplýsingum um misgerðir gegn almannahagsmunum á framfæri til almennings og eftirlitsaðila. Mörg ríki hafa nú þegar breytt lögum eða eru að vinna að lagabreytingum til verndar uppljóstrurum til að hvetja einstaklinga til að miðla upplýsingum um misgjörðir, því ef starfsmaður þess fyrirtækis sem upplýsingarnar varða missir í kjölfarið starf sitt og á jafnvel á hættu refsingu fyrir að brjóta þagnarskyldu, hefur það kælingaráhrif á miðlun upplýsinga sem þessa.  Lagafrumvarp hefur ítrekað verið lagt fram á Alþingi um verndun uppljóstrara á Íslandi, sem ekki hefur fengið brautargengi þrátt fyrir alvarlegar ávirðingar GRECO til íslenskra stjórnvalda þar um.
 
Málstofan er öllum opin og mun fara fram á ensku.
Þú ert að nota: brimir.rhi.hi.is